दाङ, २२ असोज। दाङको देउखुरीमा मोटरसाइकल दुर्घटना हुँदा दुई जना सशस्त्र प्रहरीको मृत्यु भएको छ। पूर्वपश्चिम राजमार्गअन्तर्गत राप्ती गाउँपालिका ३ मुसरियामा शुक्रबार राति लु ४० प ४९२२ नम्बरको मोटरसाइकल दुर्घटना हुँदा मोटरसाइकलमा सवार भालुवाङस्थित सशस्त्र प्रहरी बल ज्वालामाई गण २९ नम्बरमा कार्यरत लमही नगरपालिका १ का लहानु चौधरी र राप्ती गाउँपालिका ६ का सुलेश चौधरीको मृत्यु भएको हो।
दुर्घटनामा परी लहानुको घटनास्थलमै र सुलेशको उपचारका लागि कोहलपुर लैजाने क्रममा मृत्यु भएको सशस्त्र प्रहरी उपरीक्षक विनोद केसीले जानकारी दिए।
मृतकद्वय लगातारको वर्षाका कारण देउखुरीका विभिन्न ठाउँमा उद्धारमा खटिएका र डिउटी सकाएर गणमा फर्किने क्रममा दुर्घटनामा परेका बताइएको छ। घटनाबारे थप अनुसन्धान भइरहेकोे बताइएको छ।
