हिराचन रोशन जेबीमार्फत रोशन कन्ट्रक्सनले निर्माण गरिरहेको पुल ८ साउन २०७९ भित्र निर्माण सकिने गरी ८ माघ २०७६ मा सम्झौता भएको थियो। सुस्त गतिमा पुल निर्माणको काम भइरहेकाले गाउँपालिका केन्द्र र जिल्ला सदरमुकाम ओहोरदोहोर गर्न समस्या हुने गरेको औरही १ हरट्टी दरहैयाका वडा सदस्यसमेत रहेका स्थानीय रामकुमार यादवले बताए।
हुलाकी सडकअन्तर्गत सिराहा खण्डमा पर्ने पूर्व बलानदेखि पश्चिम कमला नदीसम्मका प्रायः सबै ठाउँका सडकमा कालोपत्र सकिए पनि गागनमा पुल निर्माण नहुँदा हुलाकी सडक हुँदै दैनिक ओहोरदोहोर गर्ने सर्वसाधारण अप्ठ्यारोमा पर्ने गरेको हरकट्टीका महेश यादवले बताए। करिब २० वर्षअघि औरही गाउँको पूर्वपट्टिबाट बग्ने गागनमा पुल निर्माण गरेको १० वर्षपछि आएको बाढीले पुलदेखि करिब तीन सय ५० मिटर उत्तरतिर बाँध भत्काएर खोलाले धार परिवर्तन गरेको थियो।
खोला बाँध भत्काएर पुरानो पुलभन्दा दुई सय मिटर पूर्वबाट बग्न थालेपछि स्थानीय पानीमा हेलिएर आवतजावत गर्न बाध्य छन्। ‘हिउँदमा ठीकै हुन्छ तर बर्खामा मोटरसाइकल, साइकल वारपार गराउन अप्ठ्यारो हुन्छ’, दरहैयाका वीरेन्द्र शर्माले बताए। नयाँपत्रिकाबाट।
