फाईल फोटो।
ताप्लेजुङ, ३ असार। पहिरोमा परेर ताप्लेजुङको सिरीजङ्घा गाउँपालिका ७ खेवाङमा दुई महिलाको मृत्यु भएको छ। गएराति घर माथिबाट खसेको पहिरोमा पुरिएर सासु तुलसा अधिकारी र बुहारी यशोदा अधिकारीको मृत्यु भएको हो।
पहिरोमा परेर हराइरहेका उनीहरुको पुरिएकै अवस्थामा शव भेटिएको सिरीजङ्घा गाउँपालिकाका उपाध्यक्ष डाक्टर चित्रकुमार लिम्बुले जानकारी दिए।
उनका अनुसार यशोदाका श्रीमान् विष्णु अधिकारीले भने भागेर ज्यान जोगाउन सफल भएको छ। पहिरोले अधिकारीका दुईवटै घर बगाएको छ भने नजिकै रहेका पशुचौपायासमेत पुरेको अनुमान गरिएको छ।
