सर्लाही, २१ असार। सर्लाहीको वनक्षेत्रमा गाडेको अवस्थामा शिशुको शव भेटिएको छ । जिल्लाको ईश्वरपुर नगरपालिका १३, श्रीनगरमा सोमबार अपरान्ह गाडेको अवस्थामा १४/१५ महिनाको जस्तो देखिने शिशु (छोरी) कोशिशुको शव फेला परेको हो।
सागरनाथ गाउँबाट श्रीनगरतर्फ जाने सडकदेखि केही भित्र सागरनाथ वन परियोजनाको जंगलमा वस्तु चराउन गएका गोठालाहरुले साँझ घर फर्कने क्रममा टाउको देखिने गरी गाडेको अवस्थामा शिशुको शव देखेपछि प्रहरीलाई खबर गरेका जनाएको छ।
तत्काल इलाका प्रहरी कार्यालय केशरगन्जबाट प्रहरी निरीक्षक रोशन थापाको नेतृत्वमा घटनास्थल पुगेको प्रहरी टोलीले घटनास्थलको प्रकृति मुचुल्का गरी शव पोष्टमार्टमको लागि प्रादेशिक अस्पताल मलंगवा पठाएको छ।
घटनास्थल र मृतकको शव हेर्दा हत्या गरी गाडेको जस्तो देखिएपनि प्रहरीले घटनाको सम्बन्धमा अनुसन्धान गरिरहेको जनाएको छ।
